موقع الملاعب : أفشة إنداس عليه.. بيبو يكشف كواليس عقوبات نجوم الأهلي وحملات التقطيع ضده

كشف خالد بيبو مدير الكرة السابق في النادي الأهلي، عن كواليس عقوبات نجوم القلعة الحمراء إبان توليه المهمة قبل رحيله عن منصبه. 

وقال خالد بيبو مدير الكره السابق بالنادي الأهلي عبر تصريحات تليفزيونية: “الناس عايزه كل واحد بيشتغل في مكان يبقى شغال على هواها هيا، وأنا خلال تواجدي في منصب مدير الكرة في الأهلي كانت الناس بتتكلم عليا كل شوية إني ليه مش بقوم اعترض على التحكيم زي كابتن سيد عبدالحفيظ”.

وتابع: “أنا مشيت ومحدش بقى بيتكلم في النقطة دي خالص ولا بيذكرها اصلا، والكابتن رمضان نفس الشيء لأن من طبيعته قاعد على الدكة مش بيعترض والفكره اصلا اعترض ليه على التحكيم ما هو في فار .. والسنة اللي أنا كنت فيها خدنا كل البطولات”. 

وأضاف خالد بيبو مدير الكره السابق في النادي الأهلي أيضا: “اتعمل عليا حملات وكان في ناس دايما تطلع تقول ليه مبعترضشي على الحكام وتحملني اي خساره للفريق ولما مشيت محدش بقى بيتكلم”. 

وواصل: “كابتن رمضان موجود ومتخنقشي مع الحكام ومتقالتش .. هو مش بيقوم من على الخط زي كابتن طارق سليم وكابتن صادق وثابت البطل مكنوش بيقوموا من على الخط ومحدش كان بيتكلم، وكان في أشخاص وراء توجيه الجمهور ضدي لما كنت موجود في منصب مدير الكرة، ومش هقدر أقول أسامي الأشخاص دي”. 

وأتم: “مش مسامح أي حد ورا توجيه الجمهور ضدي وإن شاء الله ربنا يوريني فيهم يوم، لأن الناس دي وحشة والأشخاص دي عارفهم كويس، وهيضروا النادي طوال تواجدهم وهما عارفين نفسهم كويس”. 

وأسهب خالد بيبو مدير الكره السابق في النادي الأهلي:  “مكنشي ينفع اطلع اقول كل قرار باخده ضد أي لاعب .. كان صوتي بيطلع جامد في غرف خلع الملابس وحصل الموضوع ده خمس مرات مثلا والكلام ده مكنشي بيطلع لحد”.

وردا على سؤال: هل كان في عقوبات تقيله ضد كهربا وأفشه؟، وقال: “آه كهربا وأفشة وكان في ناس تانية كمان وناس من كباتن الفريق اتعاقبت وأي حد غلط في تواجدي اتعاقب بس الحاجات دي مطلعتش”.

وعن عقوبات أفشة قال: “أنا صعب عليا أفشه لما طلع قرار عقابه وحسيت إن الواد ؟إنداس عليه من مصر كلها وكأنه غلط فيهم كلهم .. وقرار عقابه قولتله لانك غلطت قدام الناس كلها فكان لازم تتعاقب قدام الناس.. في الآخر اللاعيبة كلها بتغلط وده الطبيعي في كرة القدم”.

واختتم حديثه قائلا: “أنا كنت بحاول أحافظ على اللاعبين لأن دلوقتي بقى في قنوات كتيره أوي وبرامج كتيره أوي وكل واحد عنده أكونت في السوشيال ميديا بقى بيتكلم .. فلازم حاجات تبقى في الغرف المغلقة”.